港男週記-33-感激我遇見

其實有網友看完第31集時，覺得Yan都幾無理同霸道，是正宗港女，叫我想清楚才和她開始。哈哈！首先多謝大家的關心及溫馨提示。

其實我揀她的第一個原因是因為她是幾真性情及不拘小節，例如：我由於以往習慣了一個人吃飯，所以我都食得幾隨便，有時茶餐廳，有時又隨街食雞蛋仔，大家知道大部份港女識飲飲食，叫佢哋食茶餐廳，即刻黑面俾你睇添呀！我有次喺MSN問女網友，第一次同女仔去旺角食乜好，她即時話我點解去旺角食咁Cheap,話我輸硬云云，應該約個女仔去中環食高級餐廳的西餐才對，我心諗駛唔駛咁扮野呀。然後再問我打算食幾錢，我答兩個人大約五、六佰左右，她話我應該駛多D,唔好失禮人。吓！我只係一個打工既工程師咋喎，寫「港男週記」無錢收架，駛唔駛咁豪。如果個女仔對衣食住行咁有要求，即唔係我杯茶啦，不要也罷，所以我從來約女仔只會食好吃的，而不是因餐廳地點或派頭，幸運地，Yan是個很不拘小節的人，她時常會提議食的餐廳及菜式，但從來不是選高級餐廳，只求方便及好吃，所以每次見，我和她單是談吃的話題也不少。

她第二個優點是很懂禮尚往來，我曾經約會過很多女仔，但她們大多會覺得和男仔約會應該全由男性付錢，其實我也贊成的，所以我從來會主動付所有約會中的洗費，例如餐費或看戲的門票費用等等。記得在我和Yan第四次食晚飯的時候，我在臨結帳前去了洗手間，回來的時候，Yan已把帳單理了，我當時很驚訝，覺得Yan都幾好，其實並不是因我不用花費，而是因她覺得她有教養及禮貌，我可能真的遇得太多食完飯兼三兼四，多謝也無句的港女太多，所以對她加了很多印象分。

Yan最吸引我的地方可能是她的樂天性格，和她相處一段時間，當中她在工作上遇到不少困難，但我和她對話當中，從來覺得她以積極態度面對，這是很難得的。

其實我經過一年多追求港女的過程，我明白人無完美，每人也有優點及缺點，所以我對Yan間唔中會如小風波那集般有啤氣，我也不太介意的。